10 questons sobre o 22 de maio em Chantada.

Antom Fente Parada.

Na imagem Susana López Abella, actualmente com Beatriz Mato na Junta da Galiza; Ramón Barreiro, defenestrado politicamente após perder contra Feijoo na carreira do PP pola Junta e de nom alcançar a presidência da Deputaçom de Lugo; Alfredo Suárez Canal, ex-conselheiro de Medio Rural; e Manuel Lorenzo Varela, antigo alcaide polo PP e deputado provincial por esse partido que votara contra o cobro do cánon e que agora lidera INTA, vencedora sem ambagens das eleiçons do 22 de maio que chegou a disputar-lhe o concelheiro número 13 ao PP. INTA obteve finalmente 5 vareadores, o BNG 3, o PP 3 e o PSOE passou de 4 a 2 vareadores nom alcançando nem os 1.000 apoios.

1º) A direita chantadina alcança uns resultados sem parangom desde 1991, precisamente quando a direita se esgazara também em duas candidaturas. Os "independentes" da direita chegam até onde as siglas do PP nom chegárom nunca e mobilizando ao eleitorado como nunca. A soma do PP e de INTA (que nos passados comícios tinham 6 vareadores como PP) é de 8 vareadores (1.292 votos PP e 2.401 voto INTA).

2º) Esta vitória da direita produze-se num quadro em que a ascensom da extrema-direita em todo o Estado (os melhores resultados do PP na história) convida a pensar que muita gente votou em chave de estatais e que um grande número de tradicionais votantes do PSOE virou para a direita, ao tempo que outros somárom-se à abstençom para castigar nestas "primárias" ao PSOE pola sua política neocon. Destarte em toda a Europa regista-se umha defenestraçom continuada da Terceira Via enquanto sobe a direita liberal e a extrema-direita xenofóbica: os Auténticos Finlandeses, Marine Le Pen ou Soares Coelho som exemplo disto perante a caída de Papandreu, Zapatero ou Sócrates.

3º) A abstençom revela em muitas mesas que a participaçom, longe do discurso tradicional, pode favorecer à direita. Existiu nesta pequena abstençom em Chantada (em torno ao 20%) um bom número de jovens que nom votárom e que som aderentes da esquerda e, nomeadamente, do BNG. Outros que nunca votariam PP sim aderírom ao projecto de INTA.

4º) O voto-poder mostra-se mais importante do que, em princípio, se julga nomeadamente no rural que segue a ser o grande handicap do BNG de Chantada, especialmente mesas como Nogueira ou Líncora (6'67% dos votos e 9'31% dos votos respectivamente) face outras mesas rurais como Sam Fiz (22'32%), Muradelhe (23'72%) ou Laxe (25%). INTA raramente chega ao 40% nas mesas da vilta enquanto supera essa percentagem, por vezes com amplitude (sem chegar nunca a 50%) nas mesas do rural agás em Adá e Sabadelhe. A soma de direita no rural supera sempre 60% dos sufrágios agás em Mariz, Laxe e Adá.

5º) As siglas PSOE som umha carga engadida a dia de hoje. As diferenças do PSOE chantadino e a sua constante e contínua descomposiçom botárom por terra umha excelente legisltura no capítulo de gestom e inversons. Está claro que nom avonda com isto pois passárom de 1864 votos a 966 votos num duríssimo castigo do eleitorado. Só recebírom os vareadores que dá a alcaldia  historicamente esteja quem esteja nela: 2.

6º) O candidato mais valorado na vila e entre a mocidade foi sem dúvida Ildefonso Pinheiro, mas a lousa de governar até o último dia com o PSOE provocou que o BNG nom for quem de aproveitar a queda do PSOE como sim aconteceu noutros concelhos como Ponte Vedra ou Teu. Em todo caso, o BNG recebeu apoios novos com respeito a há quatro anos perdendo votos de 2007 a prol de INTA e da abstençom e ganhando alguns do PSOE, do PP e de novos votantes. Na vila os resultados do BNG som francamente bons e entre a mocidade ainda melhores.

7º) Vistos no contexto galego os resultados do BNG chantadino som excepcionais. Mantém a sua representaçom, perde pouquíssimos votos (mas o censo baixou em mil votos, se bem subiu a participaçom), num contexto onde nom existiam "governos amigos" e onde as diferenças com o PSOE, que incumpriu o pacto durante toda a legislatura, eram sobradamente conhecidas. Aliás, o BNG passa a ser a segunda força mais votada e principal alternativa para além de cabeça da oposiçom. Nom é difícil adivinhar um processo de descomposiçom e reorganizaçom do PSOE que o fagam voltar a sua situaçom tradicional (1 concelheiro) nem um apoio do PP a INTA que poda provocar umha "limpeza" no PP (solicitada já encubertamente por Manuel Lorenzo Varela na comparecência em Televinte do domingo) para umha posterior "reunificaçom" onde o PP passe a ser INTA mantendo apenas as suas siglas.

8º) O ciclo de Manuel Anxo Taboada na política municipal tocou a sua fim ao tempo que a cabeça de Susana López Abella pende dum fio, se bem os excepcionais resultados do PP na Galiza nom fam apremiar a "anexom" de INTA na direcçom do PPdG. 

9º) Manuel Lorenzo Varela, após deixar o concelho endividado em mais de sete milhons de euros, com a obra da rua Xoán XIII e a sua financiaçom com Aquagest e com a ruinosa negociaçom do eólico volta a ser alcaide. As redes clientalares, o tu a tu e a campanha casa por casa som muito mais eficientes que a difamaçom e a campanha suja do PP ou que a cordialidade e a campanha "informativa" do BNG. Quanto ao PSOE, a sua campanha praticamente nom existiu em grande parte pola guerra interna que sofre este partido entre os antigos independentes, que controlam o aparato (Surribas, Neira, Taboada, etc.), e os socialistas chantadinos históricos (Maridora, Gisi, etc.).

10º) Com participaçom no governo, com umha gestom impecável e com umha valoraçom do candidato excelente o BNG chantadino nom pode mostrar-se satisfeito ainda quando as siglas BNG nom ajudem precisamente nestes intres muito. Nas passadas passou-se de 1 a 3 e essa barreira parece agora infranqueável. Nom soubemos traduzir a simpatia polo nosso projecto em votos, ainda quando o nosso mitin e a nossa ceia-apresentaçom durante a campanha fossem os mais concorridos (como há quatro anos). No entanto, seria umha leitura embotada nom vermos que somos a oposiçom realmente existente e que isso nos pom numha muito boa situaçom, especialmente na vila, para podermos atingir nas próximas eleiçons mucicipais um excelente resultado que nos permita governar e jubilar dumha vez a velha caste política chantadina que nos conduziu e nos conduzirá muito provavelmente a um beco sem saída. Os vindouros comícios em chave estatal e nacional serám também importantes para ir vendo a evoluçom do BNG e necessitarám de campanhas cada vez mais coordenadas, extensas e que cheguem a mais e mais vizinhança. A esquerda chantadina avança nom tanto como gostariamos muitos, mas a sua ascensom semelha imparável.